Joh 13 | NdeIBE | STEP | Kwakumandulo kweDili lePhasika. UJesu wayekwazi ukuthi isikhathi sasesifikile esokuthi asuke kulo umhlaba aye kuYise. Wayehlezi ebathanda abakhe abasemhlabeni, khathesi wasebatshengisa ukujula kothando lwakhe.

John 13

UJesu Ugezisa Izinyawo Zabafundi Bakhe

1 Kwakumandulo kweDili lePhasika. UJesu wayekwazi ukuthi isikhathi sasesifikile esokuthi asuke kulo umhlaba aye kuYise. Wayehlezi ebathanda abakhe abasemhlabeni, khathesi wasebatshengisa ukujula kothando lwakhe.

2 Kwathi sekudekwa ukudla kwakusihlwa uSathane wayevele esemtshutshisile uJudasi Isikariyothi, indodana kaSimoni, ukuthi anikele uJesu. 3 UJesu wayekwazi ukuthi uYise wayenikele zonke izinto emandleni akhe, lokuthi yena wayevela kuNkulunkulu, njalo wayebuyela kuNkulunkulu, 4 ngakho wasukuma ekudleni, wakhulula izigqoko zakhe zaphezulu, wabophela ithawulo okhalweni lwakhe. 5 Ngemuva kwalokho wase ethela amanzi enditshini waseqalisa ukugezisa izinyawo zabafundi bakhe, wazesula ngethawulo leyo ayezibophe ngayo.

6 Wafika kuSimoni Phethro owathi kuye, “Nkosi, kambe wena nguwe ongagezisa izinyawo zami na?”

7 UJesu waphendula wathi, “Kawukuzwisisi lokhu engikwenzayo khathesi, kodwa uzakuzwisisa ngesikhathi esizayo.”

8 UPhethro wathi, “Hatshi, kawusoze lanini ugezise izinyawo zami.” UJesu waphendula wathi, “Uma ngingakugezisi kawulabudlelwano lami.”

9 UPhethro waphendula wathi, “Nkosi, uma kunjalo, kakungabi yizinyawo zami zodwa kodwa lezandla zami kanye lekhanda lami!”

10 UJesu waphendula wathi, “Umuntu ogezileyo umzimba wakhe kasweli ukugeza ngaphandle kwezinyawo kuphela; umzimba wakhe wonke uhlanzekile. Njalo lina lihlanzekile, loba nje kungasini lonke.” 11 Ngokuba wayemazi lowo owayezamnikela, yikho wathi kakusibo bonke ababehlanzekile.

12 Eseqedile ukugezisa izinyawo zabo, wagqoka izigqoko zakhe wasebuyela endaweni yakhe. Wababuza wathi, “Kambe liyakuzwisisa na esengilenze khona? 13 Lingibiza lithi ‘Mfundisi’ lokuthi ‘Nkosi’, lisitsho liqondile, ngoba ngiyikho lokho. 14 Manje-ke njengoba mina, iNkosi yenu loMfundisi, sengigezise izinyawo zenu, lani limele ligezisane izinyawo. 15 Sengilenzele isibonelo ukuthi lenze njengoba ngilenzele mina.

16 Ngiqinisile ukuthi kakulanceku enkulu kulenkosi yayo, njalo isithunywa kasisikhulu kulalowo osithumileyo. 17 Lingaze lizazi lezi izinto lizabusiswa nxa lizenza.

UJesu Ulinganisa Ngokunikelwa Kwakhe

18 “Kangikhulumi ngani lonke; ngiyabazi labo esengibakhethile. Kodwa lokhu kuyikugcwalisa umbhalo othi: “Lowo odla lami isinkwa sami usengihlamukele.’

19 “Ngiyalazisa manje kungakenzakali, ukuze kuthi lapho sekusenzakala lizakholwa ukuthi ngiNguye. 20 Ngilitshela iqiniso ukuthi lowo owamukela loba ngubani engimthumayo wamukela mina; njalo lowo owamukela mina wamukela lowo ongithumileyo.”

21 UJesu esatsho lokhu wakhathazeka kakhulu wafakaza wathi, “Ngilitshela iqiniso ukuthi omunye wenu uzanginikela.”

22 Abafundi bakhe bakhangelana bedidekile ukuthi kambe ngabe wayesitsho wuphi wabo.

23 Omunye wabo, lowomfundi owayethandwa nguJesu wayeyeme etafuleni eduzane laye.

24 USimoni Phethro wasemqhweba lowomfundi wathi kuye, “Mbuze ukuthi utsho bani.”

25 Waseseyama kuJesu wambuza wathi, “Nkosi, ngubani?”

26 UJesu waphendula wathi, “Kungulowo engizamupha ucezu lwesinkwa nxa sengisitshebile emganwini.” Kwathi esesitshebile isinkwa wasiqhubela uJudasi Isikariyothi, indodana kaSimoni. 27 Wonela ukusithatha isinkwa uJudasi uSathani wasengena kuye. “Lokho osufuna ukukwenza, wohlukwenze masinyane,” kusitsho uJesu kuye, 28 kodwa kakho ekudleni lapho owezwisisayo ukuthi kungani uJesu watsho njalo kuye. 29 Ngenxa yokuthi uJudasi nguye owayephatha imali abanye bacabanga ukuthi uJesu wayemtshela ukuthi athenge lokho okwakuzafuneka ngeDili, kumbe ukuthi anike okuthile kwabampofu. 30 Wonela ukuthi athathe isinkwa waphuma. Kwasekusebusuku.

31 Esehambile uJesu wathi, “Khathesi iNdodana yoMuntu isikhazimulisiwe njalo uNkulunkulu ukhazimulisiwe kuyo. 32 Aluba uNkulunkulu ekhazimulisiwe kuyo ngakho uNkulunkulu uzayikhazimulisa iNdodana kuye, njalo uzayikhazimulisa masinyane.

33 “Bantwabami, ngisezakuba lani okwesikhatshana esincane. Lizangidinga, kodwa njengoba ngabatshela abaJuda, lani sengilitshela khathesi ukuthi: Lapho engiyakhona, lingeze leza.

34 “Ngilinika umlayo omutsha: Thandanani. Limele lithandane njengoba lami ngilithandile.

35 Bonke abantu bazakwazi ukuthi lingabafundi bami uma lithandana.”

36 USimoni Phethro wambuza wathi, “Nkosi, kanti uyangaphi na?” UJesu waphendula wathi, “Lapho engiyakhona ungazake ungilandele manje, kodwa uzangilandela ngesikhathi esizayo.”

37 Wabuza uPhethro wathi, “Nkosi, kungani ngingahle ngikulandele khathesi? Ngizanikela ukuphila kwami kuwe.”

38 UJesu wasemphendula wathi, “Kambe unikele ukuphila kwakho ngenxa yami? Ngiqinisile iqhude lingakakhali uzangiphika kathathu!